曼聯喺英超主場以0-3慘敗熱刺，但場上最大爭議並非比數，而係隊長般奴費南迪斯喺上半場被紅牌直接逐出場嘅判決。
般奴費南迪斯喺賽後公開喊冤，指出紅牌係錯判。佢表示：「冇人想被趕出場，感覺好差，球隊之後再失多2球。我冇用鞋釘去鏟波，呢腳係明顯犯規，但絕對唔係紅牌。」
更令人意外嘅係，般奴聲稱連被踢嘅占士麥迪臣都同意佢唔應該被趕出場。般奴強調：「麥迪臣都同意(唔係紅牌)，如果咁都紅牌，好多其他例子都要重新去睇。」
呢次係般奴費南迪斯為曼聯上陣242場比賽以來首次拎紅牌被逐。回顧當時嘅情況，般奴出腳攔截前明顯跣腳，而且並冇踩中占士麥迪臣，紅牌判決似乎過於嚴厲。
般奴費南迪斯對判決感到不解：「球證出黃牌我會接受，但呢腳永遠冇可能係紅牌，唔明點解VAR唔叫球證去睇多次。」
因為呢個紅牌，般奴費南迪斯將停賽3場，缺席對維拉、賓福特同韋斯咸嘅聯賽。對於正處於困境嘅曼聯嚟講，呢個判決無疑係雪上加霜。