曼聯喺英超主場慘輸畀熱刺3個零，惡劣表現遭受各界嚴厲批評，博彩公司即時調低領隊坦哈格被炒嘅賠率，佢成為英超下個被炒領隊最有可能嘅人選。雖然坦哈格已經執教曼聯超過兩季，但佢賽後仍然堅持「需要時間」，強調未曾擔心過被曼聯炒魷魚。
夏天洗咗超過2億鎊買人嘅曼聯，喺開季6場聯賽中取得2勝1和3負，得咗7分，平咗球會史上英超最差嘅開季成績(2013年、2020年)；而且連續2場英超主場零入球輸波，上一次發生就係2021年11月，嗰時前領隊蘇斯克查被炒魷前亦係連輸兩場聯賽。
多位名宿紛紛發炮批評曼聯嘅表現，加利尼維利直言曼聯表現「嘔心」，里奧費迪南更話：「垃圾演出，隊伍軟弱、尷尬、無章法。雖然下半場鬥志好咗，但質素仍然不足。」前利物浦球星列納表示：「坦哈格已經無力激勵球隊，曼聯明顯係退步緊。」
博彩公司Betfair喺對熱刺比賽前，坦哈格成為英超下個被炒領隊嘅賠率係10倍，但完場後急跌至1.9倍，成為最大熱門，夏天加盟助教雲尼斯達萊成為曼聯新領隊嘅熱門人選，其次係前英格蘭國家隊主帥修夫基。
對於被炒嘅傳聞，坦哈格賽後仍然表示：「我冇擔心過被炒嘅事，夏天我哋所有人都同意繼續攜手合作，包括班主、職員、球員同我自己，大家決定同舟共濟。我哋清楚呢個過程需要時間，之後會迎來新嘅一日、新嘅比賽，我哋一定會反彈。」
